जय हिंदू-राष्ट्र

दाभोलकरांचे खुनी पकडले गेले तरी सगळे शांत का ?

डॉ. नरेंद्र दाभोलकरांच्या हत्येनंतर सनातन संस्थेवर आरोप करण्यासाठी प्रसारमाध्यमे आणि राजकारणी यांच्यात स्पर्धा सुरू होती. सनातनच्या अनेक निष्पाप साधकांची तासंतास पोलीस ठाण्यात बसवून चौकशी केली गेली. १५-२० दिवस माध्यमांना पोट भरायला दाभोलकरांच्या हत्येशिवाय दुसरा विषयच नव्हता.

            आता दाभोलकरांच्या हत्येला पाच मास उलटल्यावर नागोरी आणि खंडेलवाल असे दोन इसम दाभोलकरांच्या खुनाच्या प्रकरणी पकडले असल्याचे पोलिसांनी सांगितले, तशी वृत्तेही एक-दोन वृत्तपत्रांनी छापली असतील. पण दाभोलकरांच्या हत्येनंतर स्मशानी बोंब मारणार्‍या माध्यमांत आता स्मशान शांतता पसरली आहे.

            दाभोलकरांच्या खुनाच्या प्रकरणी पकडलेल्या आरोपींची नावे आणि डिसेंबर २०१३ च्या एका रविवारी दैनिक महाराष्ट्र टाईम्सच्या रविवार विशेष पुरवणीत आलेला लेख. या दोन्ही गोष्टींचा एकत्रितपणे विचार केल्यास फार भयंकर काहीतरी महराष्ट्राच्या राजकारणात घडत असल्याचे स्पष्ट होते. खरे खुनी कोण हे बहुतेक सर्वांनाच माहीत झाले असावे, असे हा लेख वाचल्यावर नक्की वाटते. प्रशांत आहेर आणि दैनिक महाराष्ट्र टाईम्स यांचे आभार मानून हा लेख जसाच्या तसा येथे देत आहे. त्याचे शिर्षक आहे ‘तपासाच्या चक्रव्युहात पोलीस’

तपासाच्या चक्रव्यूहात पोलिस

प्रशांत आहेर
अंधश्रद्धा निर्मूलन समितीचे कार्याध्यक्ष डॉ. नरेंद्र दाभोलकर यांची हत्या होऊन चार महिने उलटल्यानंतरही पोलिसांकडून एकाही आरोपीला अटक करण्यात आलेली नाही. एटीएस, महाराष्ट्र पोलिस ' सावजा ' च्या शोधात तपासाच्या थिअरी मांडत असताना खरे आरोपी मात्र नजरेच्या टप्प्यातही नाहीत. कारण, तपासाच्या या चक्रव्यूहात पोलिसच अडकत चालले आहेत.
महाराष्ट्र अंधश्रद्धा निर्मूलन समितीचे कार्याध्यक्ष डॉ. नरेंद्र दाभोलकर यांच्या मारेकऱ्यांना शोधण्यासाठी तपास यंत्रणांनी कष्ट घेतल्याचा दावा केला आहे. मात्र, त्यांना अपेक्षित यश मिळालेले नाही. गेल्या चार महिन्यांमध्ये करण्यात आलेल्या तपासादरम्यान पुलाखालून बरेचसे पाणी वाहून गेले आहे. दाभोलकरांच्या हत्येला शुक्रवारी चार महिने पूर्ण झाले. विधिमंडळाचे अधिवेशनही संपले. ​मात्र, या हत्येच्या तपासाविषयी विधिमंडळात फारशी काही चर्चा झाली नाही. त्यामुळे दाभोलकरांची हत्या सरकार आणि विरोधकांनी किती गांभीर्याने घेतली, हे सर्वांनाच दिसले.
दाभोलकरांच्या हत्येच्या तपासात पुणे पोलिस, दहशतवादविरोधी पथक (एटीएस) यांनी कष्ट घेतल्याचे दिसले आहे. या तपासादरम्यान अनेकदा आरोपी सापडल्याचे चित्र उभे राहिले. मात्र, प्रत्यक्षात संशयित मिळाले की भलतेच निघायचे अन् आपला हा प्रयत्न फसला, असे म्हणत पोलिस दुसऱ्या सावजाच्या शोधात फिरायचे, असा पाठशिवणीचा खेळ सुरू होता. याच काळात ठाण्यात एक घटना घडली होती. या घटनेचा दाभोलकर यांच्या हत्येशी विनाकारण संबंध आला आणि पोलिसांच्या तपासाच्या दिशाच बदलल्या. या घटनेतील ' शोधा ' मुळे ' एटीएस ' आणि पुणे पोलिसांची पुरती भंबेरीच उडाली आहे.
दाभोलकरांची हत्या झाली त्या दिवशी म्हणजे २० ऑगस्ट रोजी मुंब्रा पोलिसांनी ठाण्यात चार आरोपींना अटक केली होती. या अटकेतील एका आरोपीची गर्लफ्रेंड मुंब्र्यात राहते. तिच्या ' मामा ' कडून खंडणी मागण्याचा गुन्हा या आरोपींनी केला. या गुन्ह्यात मुंब्रा पोलिसांनी त्यांना अटक केली. यातील मुख्य आरोपी हा पश्चिम महाराष्ट्रातील सर्वांत मोठा ' आर्म डीलर ' आहे. दाभोलकर यांची हत्या करण्यासाठी पिस्तुल वापरले गेल्याने साहजिकच सर्वच तपास यंत्रणांच्या नजरा या आरोपींकडे वळल्या. मुंब्रा पोलिसांनी या आरोपींकडून जप्त केलेली पिस्तुले ' बॅलेस्टिक एक्स्पर्ट ' कडे पाठविली होती. त्याच वेळी पुणे पोलिसांनी दाभोलकर यांच्या शरीरात मिळालेल्या गोळ्याही ' बॅलेस्टिक एक्स्पर्ट ' कडे पाठविल्या होत्या.
पुणे पोलिस त्यांचा तपास करत होते, तर ' एटीएस ' ही या गुन्ह्याची उकल करण्यात गुंतलेले होते. ' एटीएस ' ने हा ' आर्म डीलर ' आणि त्याच्या साथीदारांना बेकायदा शस्त्र बाळगल्याप्रकरणी अटक केली. त्यांच्याकडून ४७ पिस्तुले जप्त केली गेली, तर जवळपास चाळीस दिवस हे आरोपी ' एटीएस ' च्या पोलिस कोठडीत होते. ' एटीएस ' हेडक्वार्टरमध्ये गेलेले दहशतवादी पोपटासारखे बोलतात, तर या चौघांची काय बिशाद होती. हा तपास सुरू असताना अचानक एके दिवशी ' बॅलेस्टिक एक्स्पर्ट ' चा एक अहवाल ' एटीएस ' ला मिळाला. त्यामध्ये मुंब्रा पोलिसांनी अटक केलेल्या आरोपींकडील पिस्तुल आणि दाभोलकरांच्या शरीरात मिळालेल्या गोळ्या ' मॅच ' झाल्याचा दावा करण्यात आला होता. या अहवालाच्या आधारे ' एटीएस ' ने संबंधितांकडे कसून तपास केला. या ' आर्म डीलर ' कडून पिस्तुले घेऊन भाईगिरी करणाऱ्या पश्चिम महाराष्ट्रातील अनेक गुन्हेगारांना ' एटीएस ' चे हेडक्वार्टर पाहायला मिळाले. मात्र, त्यातून फारसे काही हाती लागले नाही. अखेर या चौघांची पोलिस कोठडी संपल्यानंतर त्यांची रवानगी ' एटीएस ' ने जेलमध्ये केली. त्यानंतर ' एटीएस ' ने तो ' बॅलेस्टिक एक्स्पर्ट ' चा अहवाल पुणे पोलिसांना पाठविला.
' बॅलेस्टिक एक्स्पर्ट ' चा अहवाल पुणे पोलिसांना मिळताच अनेकांची गाळणच उडाली. काही वरिष्ठ अधिकारी तर रजेवर निघून गेले. त्यामुळे निर्णय काय घ्यायचा, असा प्रश्न पुणे पोलिसांसमोर पडला होता. त्यात विधिमंडळाचे अधिवेशन तोंडावर येऊन ठेपले होते. मुंबईतून या घटनेची सूत्रे फिरत होती. अखेर पुणे पोलिसांनी या गुन्हेगारांना वेगळ्या गुन्ह्यांत ' ट्रान्स्फर ' करावे, यावर मुंबई-पुण्यातील उच्चाधिकाऱ्यांच्या बैठकीत एकमत झाले. या आरोपींना एका खुनाच्या गुन्ह्यात ' ट्रान्स्फर ' करण्यात आले. जवळपास चौदा दिवस पुणे पोलिसांनी या आरोपींकडे कसून तपास केला. जे आरोपी ' एटीएस ' ला फुटले नव्हते, त्यांच्याकडून पुणे पोलिसांना असे काय विशेष सापडणार होते. अखेर या आरोपींच्या पोलिस कोठडीची मुदत संपली. त्यामुळे त्यांची रवानगी ठाणे जेलमध्ये करायची की त्यांना दुसऱ्या गुन्ह्यांत ट्रान्स्फर करायचे, हा प्रश्न उभा राहिला.
या आरोपींच्या पोलिस कोठडीदरम्यान अधिवेशनास सुरुवात झाली होती. अधिवेशन दोन आठवडे चालणार असल्याने उद्या सभागृहात काय उत्तर द्यायचे, असा प्रश्न उपस्थित झाला होता. त्यामुळे हे आरोपी पोलिस कोठडीतच राहिले पाहिजेत, यावर एकमत झाले होते. मात्र, त्यांना दाभोलकर हत्येच्या गुन्ह्यात अटक करायची, की दुसरा गुन्हा शोधायचा यावर चर्चा झाली. सरतेशेवटी दुसऱ्या एका खुनाच्या गुन्ह्यात त्यांना ' ट्रान्स्फर ' करण्याचा निर्णय झाला. गुन्हे शाखेच्या वरिष्ठांनी आपल्या अधिकाऱ्यांना तसे फर्मान सोडले. मात्र, गुन्हे शाखेतील काही अधिकाऱ्यांनी त्यांच्या फर्मानाला उत्तर दिले नाही तर काहींनी स्पष्ट विरोध केला. विरोध करणाऱ्या ​अधिकाऱ्यांचे लेखी ' एक्स्प्लेनेशन ' ही मागविण्यात आले. अखेर एका अधिकाऱ्याने या आरोपींना ट्रान्स्फर करण्याची हिंमत दाखविली. अशा प्रकारे ते चौघे पुन्हा पुणे पोलिसांच्या कोठडीत आले.
ज्या खुनाच्या गुन्ह्यात मयत झालेल्या व्यक्तीची ओळख पटलेली नाही, अशा गुन्ह्यात आरोपींना अटक करण्याचा ' भीमपराक्रम ' पुणे पोलिसांनी केला. या गुन्ह्यातही सात दिवसांची पोलिस कोठडी घेण्यात आली. कोठडीची मुदत संपल्यानंतर पुणे पोलिस त्यांना घेऊन कोर्टात गेले आणि पोलिस कोठडीची मुदत वाढवून मिळण्याची विनंती केली. मात्र, मयताचीच ओळख पटवू न शकलेल्या पुणे पोलिसांची विनंती कोर्टाने अमान्य केली अन् त्यांना जेलमध्ये पाठविण्याचे आदेश दिले. त्यानंतर दोन दिवसांनी म्हणजे गेल्या शुक्रवारी विधिमंडळाचे अधिवेशन संपले. एकीकडे विधिमंडळात काही गोंधळ होऊ नये, यासाठी डॉक्टरांच्या हत्येच्या तपासाचा करण्यात आलेला फार्स पोलिसांनी संपवला तर दुसरीकडे विरोधकांनी दाभोलकर हत्येच्या तपासाबाबत सरकारला जाब ​न विचारताच अधिवेशन संपवले.
' बॅलेस्टिक एक्स्पर्ट ' च्या अहवालाच्या आधारे संबंधित संशयितांकडे पुणे पोलिसांना ​अधिकृतरीत्या तपास करावाच लागणार आहे. काही निवृत्त पोलिस अधिकाऱ्यांच्या मते पुणे पोलिसांनी ' त्या ' संशयितांना अटक करून त्यांच्याकडे तपास करावा. ' सीबीआय ' सारख्या एजन्सीकडे हा तपास गेला, तर पुणे पोलिसांच्या तपासात त्रुटी राहिल्याचा ठपका ठेवण्यात येऊ शकतो. पुणे पोलिस या आरोपींना अटक करण्यास तयार असले, तरी मुंबईतून या आरोपींना अटक करण्याची परवानगी मिळत नाही. त्यामुळे पुणे पोलिसांना तपासाचा तमाशा पाहण्याशिवाय पर्याय नाही.
इकडे आड ... तिकडे विहीर
' बॅलेस्टिक एक्स्पर्ट ' च्या अहवालामुळे तपासास गती मिळण्यापेक्षा गोंधळच अधिक वाढला आहे. हा अहवाल सगळ्यात आधी ' एटीएस ' ला मिळाला होता. त्यांनी संबंधित संशयितांकडे चौकशीही केली होती. मग त्यांनी हा अहवाल जाहीर का केला नाही? अहवालातील दावा आणि वस्तुस्थितीत फरक आल्याने तो जाहीर करण्यात आला नसल्याचे खासगीत सांगण्यात येते. त्यानंतर तो अहवाल पुणे पोलिसांकडे आला आहे. आजतागायत पुणे पोलिस, ' एटीएस ' आणि गृह मंत्रालय यांनी अहवालाबाबत जाहीररीत्या ब्रसुद्धा काढलेला नाही. संशयितांकडे साठ दिवसांहून अधिक काळ पोलिस कोठडीत तपास केल्यानंतरही या अहवालाबद्दल गृहमंत्री सभागृहाला अथवा माध्यमांना सांगण्याचे धारिष्ट्य दाखवत नसतील, तर त्यांच्या मौनाचा अर्थ काय घ्यायचा?
' बॅलेस्टिक एक्स्पर्ट ' च्या अहवालाचा खऱ्या गुन्हेगारांना फायदा होणार नाही, याची काळजी तपास यंत्रणांना घ्यावी लागणार आहे. ' बॅलेस्टिक एक्स्पर्ट ' च्या दाव्यानुसार गोळ्या झाडण्यासाठी वापरण्यात आलेले पिस्तुल यंत्रणांना मिळालेले आहे. पिस्तुल ज्याच्या ताब्यातून मिळालेले तो सध्या अटकेत आहे. दाभोलकरांच्या शरीरात मिळालेल्या गोळ्या आणि पिस्तुल ' मॅच ' झालेले आहे. मात्र, अटकेतील आरोपींना दाभोलकरांच्या हत्येविषयी काहीही माहिती नाही. या गोंधळामुळे, उद्या खरे मारेकरी सापडले तर याचा त्यांना फायदा व्हायला नको, अशी भीती पोलिस दलातील वरिष्ठ अधिकारी व्यक्त करत आहेत. त्यामुळे एकदा गृहमंत्री अथवा पुणे पोलिसांनी ' बॅलेस्टिक एक्स्पर्ट ' चा अहवालाचे रहस्य जाहीररीत्या स्पष्ट करावे. महाराष्ट्र पोलिसांना या गुन्ह्याचा तपास करणे अवघड बनले असेल, तर त्यांनी तो ' सीबीआय ' सारख्या यंत्रणेकडे सोपवावा. दाभोलकरांची हत्या कोणी केली यापेक्षाही का करण्यात आली हे अतिशय महत्त्वाचे. उद्या मारेकरी सापडले अथवा सापडवले तरी हत्या का झाली, याची उत्तरे तपास यंत्रणांना द्यावीच लागणार आहेत.